• الرئيسية
• أخبار مصر

ننشر نص التحقيقات في القضية المتهمة فيها البلوجر علياء قمرون بعد نشرها مقاطع فيديو تضمنت ألفاظًا وإيحاءات جنسية خادشة للحياء العام تتعارض مع القيم المجتمعية.

أقوال علياء قمرون

س: متى وأين تم ضبطك تحديدا؟
ج: أنا اتاخدت من بيت أخو جوزي في حلوان الساعة 8 مساء تقريبًا.

س: وما هو عمل والدك تحديدًا؟
ج: أبويا شغال نقاش.

س: وما هو إجمالي دخله تحديدًا؟
ج: معرفش بياخد كام بس إحنا ظروفنا كانت صعبة.

س: وما هو عمل والدتك تحديدًا؟
ج: أنا أمي ست بيت وهي متجوزة واحد تاني وعايشة بعيد عني وماليش أي علاقة بيها.

س: ومن القائم على إعالتك تحديدًا؟
ج: أنا لحد ما خلصت دراسة كان أبويا اللي بيصرف عليا، وأنا من حوالي 4 سنين اللي بصرف على نفسي.

س: وما هو مصدر دخلك تحديدًا؟
ج: أنا كنت شغالة عاملة نظافة في مستشفى في طنطا وكنت ببيع مناديل في الشارع.

س: وما هو إجمالي دخلك آنذاك تحديدًا؟
ج: يعني 3 أو 4 آلاف جنيه تقريبًا.

س: وما هو سبب تركك لمنزل والدك تحديدًا؟
ج: لأنه كان بيعاملني وحش هو ومراته وكانوا بيضربوني فكان غصب عني لازم أمشي من بيت أبويا.

س: ومتي كان ظهورك الأول على موقع التواصل الاجتماعي (تيك توك)؟
ج: أنا بدأت على التيك توك في شهر أبريل سنة 2025.

س: وما هو السبب في انتشار ذلك المقطع المصور آنذاك؟
ج: بسبب إني كنت بغني أغنية قمرون بتلقائية فالناس عجبهم الفيديو وبقى تريند.

س: ما هي الفترة الزمنية التي استمريتي في نشر مقاطع مرئية ومسموعة على حسابك على منصة تيك توك؟
ج: أنا بنزل فيديوهات من شهر أبريل 2025 بس لما اتحبست السنة اللي فاتت وقفت فيديوهات شوية.

س: وما هي أنواع المقاطع المصورة التي يتم نشرها على منصة تيك توك بشكل عام؟
ج: هو موقع عادي ممكن بيتفتح عليه حسابات شخصية وممكن ننزل عليه فيديوهات عادية وممكن نعمل لايفات مع ناس تانية والفيديوهات العادية دي مش بتجيب فلوس اللي بيجيب فلوس هي اللايفات عن طريق الدعم اللي بيجي في اللايفات عن طريق المتابعين سواء وردة أو حوت أو زرافة وإحنا في اللايفات بنعمل جولات وفي الجولات دي بقى بيتبعت لينا هدايا والهدايا دي بتكون عبارة عن فلوس بتتحط في حسابنا على التيك توك والفلوس دي بتختلف بحسب هي وردة أو حوت أو زرافة أو أسد.

س: ومن هم الداعمين تحديدًا؟
ج: المتابعين اللي بيخشوا اللايف ويبعتوا الهدايا وتحديدًا لما بنخش جوالات مع بعض وبنكون بنهزر وبنسأل بعض أسئلة عن حياتنا ونقول للناس كبسوا.

س: وما هي الهدايا التي يرسلها لك المتابعين وما هو نوعها وما هي قيمتها؟
ج: هي عبارة عن وردة أو حوت أو زرافة أو أسد، والورد بربع جنيه والحوت بـ 1500 ألف جنيه والزرافة بـ 600 جنيه والأسد بـ 30 ألف والهدايا دي مبتجيش بثمنها كله عشان التيك توك بياخدوا التلتين وأنا باخد التلت بس وده اللي بينزلي على رصيدي في التيك توك لغاية ما أسحبها أحولها على الحساب بتاعي على فيزا فوري واللي ربطها على حساب التيك توك بتاعي.

س: وما هو اسم الحسابات الخاصة بك على منصات التواصل الاجتماعي المختلفة؟
ج: عندي أكونت واحد على تيك توك اسمه علياء عليه حوالي 860 ألف متابع وعندي أكونت على الفيس بوك اسمه عليا قمرون عليه واحد وستين ألف متابع وعندي أكونت على إنستجرام اسمه علياء عليه 12 ألف متابع.

س: وما الذي دعاكي لإنشاء تلك الحسابات؟
ج: أنا بنشر عليها الفيديوهات بتاعتي وبعمل لايفات على تيك توك.

وأردفت علياء قمرون في التحقيقات قائلة: طلعت جولة على تيك توك مع شاكر، وفي الأكونت بتاعي زاد عدد المتابعين أكتر، وبقيت بيجيلي فلوس كويسة، حوالي 30 ألف جنيه في الشهر تقريبًا، وكنت بطلع لايف كل يوم تقريبًا.