• الرئيسية
• أخبار مصر

كشف أحمد البشكار، المحامي وصديق الشاب محمد المتهم بإنهاء حياة والديه بقرية محلة مرحوم بطنطا، تفاصيل صادمة حول شخصية المتهم وظروفه النفسية والاجتماعية قبل وقوع الجريمة التي هزت محافظة الغربية.

أنا صديقه قبل أن أكون محاميه

وقال البشكار: "قبل ما أكون ضمن هيئة الدفاع عن محمد أنا صاحبه وزميل دراسته ودفعة واحدة، وكلمة متهم صعبة جدًا على لساني، لكن بحكم مهنتي كمحام فهو في منظور المجتمع والقانون متهم حاليًا، ولو هتكلم من منطلق الصداقة حاجة ومن منطلق القانون حاجة تانية خالص".

 أحمد البشكار، المحامي وصديق الشاب محمد المتهم

حافظ للقرآن

وأضاف: "محمد من الناس المحترمة جدًا، إنسان متربي وطالع من بيئة نظيفة وحافظ لكتاب الله، ووالده الله يرحمه ووالدته ست محترمة لا نعلم عنهم إلا كل خير، وده مش كلام مرسل، البلد كلها تعلم ذلك، محمد إنسان في حاله وبعيد عن المشاكل ومالوش في سكة مخدرات ولا قهاوي ولا سهر، وكان أشطر واحد فينا دراسيًا، عشان كده الخبر نزل صدمة على دماغ الناس كلها، قرية محلة مرحوم عاشت أياما صعبة".

بداية الصدمة النفسية منذ 2020

وكشف محامي المتهم مفاجأة حول حالته الصحية، قائلًا: "محمد حصلت له صدمة نفسية في حياته بدأت من سنة 2020، قلبه ونفسيته ما استحملتش بعض الأمور اللي بتحصل لأي حد، وبالفعل بدأ يمشي في إجراءات علاجه، ووالده ووالدته كانوا دايمًا مساندينه ومتواجدين معاه عند الدكاترة، لأنه بيعاني من انفصام في الشخصية وهذيان مزمن حاد، وده كان بيظهر عليه في الفترة الأخيرة، بدأنا نحس إن ده مش محمد".

وأوضح: "محمد كان بارا جدًا بأهله لدرجة إنه لحد سنه ده ما اتجوزش عشان يفضل تحت رجل والده ووالدته اللي بلغوا أرذل العمر، كان بيروح السوق يجيب لهم الخضار ويروح بوالده للدكاترة، والناس كلها كانت بتشوفه تحت رجليهم، فيصعب على العقل يتقبل إنه يعمل كده وهو متزن".

6 ساعات من عدم الاتزان

وعن سير التحقيقات، قال البشكار: "محمد قعد 6 ساعات في التحقيق غير متزن ومش فاهم إيه اللي بيدور حواليه، بيتسأل السؤال بيصبر شوية على ما يرد، ولو اتسأل نفس السؤال بعد 5 دقايق يقول أنا قلت الكلام ده؟ هو غايب في عالم تاني، وكل هيئة الدفاع كنا قاعدين في ذهول تام".

شائعات ادعاء النبوة غير صحيحة

ونفى المحامي ما تردد على مواقع التواصل الاجتماعي، مؤكدًا: "أحب أبرأ جملتين شائعين جدًا، إن محمد ادعى النبوة أو قال إن الرسول جاله في المنام، لا يا جماعة محمد ما قالش الكلام ده نهائي لا في التحقيقات ولا لأهله ولا لأصحابه، دي حاجات بتتقال عشان تشد الناس وتجيب مشاهدات وفلوس".

الفيصل هو تقرير الصحة النفسية

واختتم البشكار تصريحاته لـ "تليجراف مصر" قائلًا: "أنا كمحامٍ ما أقدرش أفصل هل محمد كان متزن وقت الواقعة أو لا، إحنا مربوطين بانتظار عرضه على الصحة النفسية ومصلحة الطب النفسي هي اللي هتقول كلمتها وهي اللي هتفصل في مدى اكتمال أهليته ومسؤوليته الجنائية، إحنا ماشيين بقانون، لكن كصاحبه أنا عارف إنه غير متزن ومريض بمرض صعب، لا على المريض حرج".

وناشد الرأي العام قائلًا: "نلتزم الصمت شوية لأن الموضوع في إيد النيابة والقضاء، كل كلمة بتتقال بتأذي أسرة محترمة وعندهم بنات متزوجة وكل واحدة في عيلة، الناس دي ما تستاهلش الخوض في عرضها، نسيب القضاء يقول كلمته وربنا يفك كربه ويظهر الحقيقة".