• الرئيسية
• رياضة

وجه الإعلامي محمد فارس، مقدم برنامج «في ضهر الأهلي»، رسالة إلى علي محمود، لاعب منتخب مصر، عقب انضمامه إلى قائمة الفراعنة التي أعلنها حسام حسن، المدير الفني للمنتخب، استعدادًا للمباريات المقبلة.

وأكد فارس أن انضمام علي محمود إلى المنتخب يمثل فرصة مهمة في مسيرته الكروية، مطالبًا اللاعب باستغلالها وإثبات أحقيته بالوجود مع الفراعنة من خلال مستواه داخل الملعب.

محمد فارس: فرصة علي محمود قد تغير مسيرته

وكتب محمد فارس عبر حسابه على موقع التواصل الاجتماعي «فيسبوك»: «علي محمود لازم يفهم إن الفرصة اللي اداها له كابتن حسام حسن مش مجرد انضمام للمنتخب، دي ممكن تكون نقطة تحول كاملة في مسيرته، والفرص اللي بالشكل ده لازم تمسك فيها بإيديك وسنانك».

وأضاف: «حسام حسن طول الوقت بيدور على اللاعب اللي عنده حتة مختلفة، ميزة يقدر يبني عليها ويطلّع منها لاعب أحسن وأقوى، وعشان كده شفنا معاه لاعيبة كتير بتروح لمكان تاني تمامًا».

فارس: حسام حسن تحمل الانتقادات بسبب اختياره

وأشار محمد فارس إلى أن قرار حسام حسن بضم علي محمود جاء رغم احتمالية تعرض المدير الفني للانتقادات، خاصة أن اللاعب لم يكن ضمن قائمة الأهلي في مباراته الأخيرة، بحسب ما ذكر فارس.

وقال: «والأهم إن حسام حسن وهو بياخد قرار ضم علي محمود كان عارف كويس إن القرار ده ممكن يفتح عليه باب هجوم وضغوط، لأنه اختار لاعب آخر مباراة له كان برا قايمة الأهلي».

وتابع: «ومع ذلك، محسبهاش بالشكل ده. محسبش ردود الأفعال ولا الهجوم اللي ممكن يتعرض له، وانتصر لرؤيته كمدرب، وقال طالما أنا شايف حاجة في اللاعب ده تستحق، يبقى هاخده وأتحمل قراري».

محمد فارس يستشهد بإمام عاشور

واستشهد فارس بواقعة سابقة تتعلق بإمام عاشور، موضحًا أن حسام حسن سبق أن اتخذ قرارًا بضم لاعب كان عائدًا من إصابة طويلة.

وقال: «وعملها قبل كده مع إمام عاشور. لاعب كان راجع من إصابة طويلة وغايب لشهور، ومع ذلك حسام راهن عليه وأخده كأس الأمم، واتعرض وقتها لهجوم كبير، وفي الآخر رهانه كان صح».

رسالة محمد فارس إلى علي محمود

واختتم محمد فارس رسالته لعلي محمود بالتأكيد على أن الاستفادة الحقيقية من فرصة الانضمام إلى منتخب مصر ستكون من خلال الأداء داخل الملعب، وليس التصريحات أو الحديث عن الفرصة.

وقال: «عشان كده علي محمود لازم يعرف إن حسام حسن اداله في التوقيت ده حاجة أكبر من مجرد فرصة لعب، والرد على الثقة والفرصة دي مش بالكلام، الرد الحقيقي يبقى في الملعب. فخليك قد الرهان، ورد الجميل في الملعب».